Kalaallit Nunaanni innuttaassuseq najugaqarsinnaatitaanerlu pillugit inatsimmut” missingiut

Kikkut ”kalaaliunerannik” oqallinnerujussuaqalerataannaavoq. Kisianni naassaanngitsumik oqallinnerit atorfissaqartinngilavut, sumulli eqqarsaatigalugu aalajangerniagaq tassaavoq Kalaallit Nunaat namminersortunngorsimalerpat kikkut innuttaasinnaanersut kikkullu najugaqarnissamut / sulinissamut akuerisaassanersut.

Matumani inuppalaartumik inatsisiliornissaq siunertaavoq naak taamaaliornikkut aaqqissuussineq ilaasa atornerlunniarsinnaassagaluaraat. Inuit amerlanngeqaagut inissaqaqaagullu, allamiullu nunatsinnik uummammikkut orniginnilersimasut inatsisiliornermi isiginiartariaqarput.

INNUTTAASSUSERMUT INATSIMMUT MISSINGIUT
§ 1 Kalaallit Nunaanni innuttaassuserminnik siusinnerusukkut iperaasimanngitsut innuttaajunnaarsitaasimanngitsulluunniit innuttaasinnaatitaapput kiisalu aamma innuttaasinnaatitaapput makku

Imm. 1: Nunami Kalaallit Nunaata ilagisaani inuusimasut
Imm. 2: Kalaallit Nunaanni innuttaanissamik piumasaqaatinik naammassinnissimasut, soorlu
  1. Kalaallit Nunaannut atasumik inuusimasumik angajoqqaalik ungasippallaarujussuanngitsumilluunniit siulilik
  2. Qinnuteqarneq ukiunik pingasunik sioqqullugu Kalaallit Nunaanni inuunini tamaat najugaqarsimalluni innuttaasumik najugaqatigalugu aappaqarsimasoq

Oqaaseqaat: Tamatumuunakkut kikkulluunniit Kalaallit Nunaannut attuumassuteqartut innuttaassuseqalernissaat qularnaarneqassaaq. Meeqqat Kalaallit Nunaanni inunngorsimanngitsunik angajoqqaaqarlutik nunani allani inunngortut, aammalu Kalaallit Nunaanni inunngorsimasuunngitsunik aatakkullit innuttaassuseqalersinnaapput aataqqii aanaaqqiiluunniit maani inunngorsimasutut nalunaarsimappat. Taamaaliornikkut kikkut nunasiaanerup kingunerinik attuumassuteqarnerminnik annaasaqangajassimagaluartulluunniit ilanngussinnaassavavut.

Ikaarsaarnermi aalajangersagaq
§2 Naalagaaffiup Kalaallit Nunaata namminersulerfiani inuit makku innuttaassuserneqassapput:
  1. Maani najugallit ukiuni kingullerni tallimani amerlanerusuniluunniit Kalaallit Nunaanni najugaqarsimasut
  2. Oqartussaassusiiagaasimasut imaluunniit inuit 18 inorlugit ukiullit Kalaallit Nunaanni innuttaasumik nakkutilliisullit paarsisullillu a)-p ataaniipputtaaq naak ukiut tallimat amerlanerusulluunniit maaniissimanngikkaluarlutik.
  3. Allamik innuttaassuseqarnissaq kissaatigineqarsimappat Kalaallit Nunaanni innuttaassutsip iperarnissaanut qaammatinik pingasunik periarfissaliisoqassaaq. Tamanna Kalaallit Nunaanni innuttaassusermik iperaanertut isigineqassaaq, tak. § 1, tassa oqartussaatitaanngitsut pineqanngippata, tak. 3.

Oqaaseqaat: Kikkulluunniit maani najugallit innuttaajumasullu tikilluaqqusaapput. Meeqqat akuleriinnik angajoqqaallit 18-inik ukioqalernissamik tungaannut marloqiusamik innuttaassuseqarsinnaatitaassapput avissaartoqassagaluarpat angajoqqaartik sorleq ilagiumanerlugu toqqaasinnaatitaaqqullugit.

Marloqiusamik innuttaassuseqarneq
§ 3 18-inik ukioqalereersimalluni nunami allami innuttaassuseqaraani Kalaallit Nunaanni innuttaasoqarsinnaangilaq.
Imm. 1: Tassalu Kalaallit Nunaannut innuttanngornermi pissuteqarluni kinguarsarnertaqanngitsumik marloqiusamik innuttaassuseqarneq atuukkunnaassaaq
Imm. 2: Kalaallit Nunaannut innuttanngornermiit qaammatit pingasut qaangiunneranni marloqiusamik innuttaassuseqarneq atorunnaarsimanngippat Kalaallit Nunaanni innuttaasinnaatitaaneq atuukkunnaassaaq.
Imm. 3: 18-inik ukioqalernissap tungaanut marloqiusamik innuttanngortoqarsinnaavoq innuttaassuserlu attanneqarsinnaalluni, tamatumali kingorna marloqiusumik innuttaassuseqarneq ajornassaaq Kalaallit Nunaanni innuttaassuseq pigiinnarumagaanni.
a) 18-it inorlugit ukiulik marloqiusamik innuttaassuseqaruni 18-inik ukioqalernerminit qaammatit pingasut qaangiutsinnagit sorlermut innuttaassuseqarumanerminik nalunaassaaq.
  1. 18-inik ukioqalernermi oqartussaassuseerutsitsisoqarsimappat kiisalu oqartussaassuseerutsitaanerup atuukkunnaarnissaata tungaanut innuttaassuseq pillugu aalajangernissaq 18-iliinermiit qaammatit pingasut qaangiutsinnagit nakkutilliisussaatitaasumit nalunaarutigineqassaaq.
  2. Nalunaarutiginnittoqanngippat suna pissutaanersoq apeqqutaatinnagu innuttaassuseq Kalaallit Nunaannut atajunnaassaaq. Naammagittaalliuteqarsinnaatitaanerli eqqarsaatigalugu § 1-imisut innuttaassusermik atorunnaarsitsinermi tamanna atuutinngilaq.
  3. Allamiut inatsisaat pissutigalugu 18-inik ukioqalernermi innuttaassuseq alla annaaneqarpat innuttaassuseq alla pissarsiarineqarsimanngippat Kalaallit Nunaanni innuttaassuseq ingerlaqqissaaq.

Oqaaseqaat: Ilumut innuttaajumasunik, imaanngitsumik iluarileraangamikku aatsaat innuttaajumasartunik, innuttaqarnissarput pingaaruteqarpoq. Taamaammat piumasaqaatigineqarpoq innuttaassuseq iperarsimanngikkaanni aatsaat innuttaasoqarsinnaassasoq kiisalu 18-inik ukioqalereersimagaanni marloqiusamik innuttaasoqarsinnaassanngitsoq. Marloqiusumik innuttaassuseqarneq akuerigaluarutsigu ullumikkutut inissisimassaagut.

Najugaqarsinnaatitaaneq (missingiutaagallartoq)
Tamatumani siunertaavoq nunaassasugut inuppalaarfiusunik malittarisassalik, atornerlunneqarsinnaanngitsunilli. Taamaammat innuttaassuseqarani najugaqaannarsinnaatitaagaanni pisortaniit pisartakkat qinersisinnaatitaanerlu annaaneqassapput.

1. Najugaqarsinnaatitaapput kikkulluunniit
  1. anisitaassutaasinnaasumik inatsimmik unioqqutitsisimanngitsut.
  2. najugaqarnermik nalaani uppernarsakkamik qularnaveeqqusikkamilluunniit imminnut pilersorsinnaasut.
2. Innuttaanngitsut Kalaallit Nunaanni innuttaasunik maaniluunniit najugaqartunik angajoqqaallit meerallilluunniit najugaqarnissamut akuerineqassapput.
3. Najugaqarsinnaanermut akuersissuteqartoqartassaaq allaffissornikkut malittarisassat aalajangersimasut tulliuttunut tunngasut naapertorlugit
  1. aapparisat peqataasut
  2. ilinniartut
  3. ilisimatusartut
  4. kulturikkut paarlaasseqatigiinneq / kulturikkut sulineq
  5. sulisartut
  6. suliffeqarfinnik piginnittut
  7. nunani allani atorfilittat
  8. qimaasut najugaqarallarnissamik qinnuteqartut

Allaffissornikkut malittarisassat piumasaqaatinik piffissaliussanillu atorunnaarallartitsisarput (pinermi ataatsimit sapaatit akunnialuiniit ukiut marluk tikillugit). Nunasisarneq pillugu inatsit tunngavigalugu malittarisassat aalajangersagaapput.
Takornariat tikinnerminni takornariatut allagartalerneqartassapput, immaqa www-imik qinnuteqartoq atorlugu. Najugaqarnissamik akuersissut naapertorlugu suliat ingerlanneqarsinnaasut suliarinagit sivisunerpaamik qaammatini pingasuni nunamiittoqarsinnaavoq.
Innuttaasuunngikkaanni kommunimut Inatsisartunulluunniit taasisoqarsinnaanngilaq. Akiliunneqarluni napparsimavimmi sullinneqarsinnaatitaaneq, utoqqalinersiaqarneq, pisortanit pisartagaqarsinnaaneq allallu innuttaanngikkaani annaaneqassapput.

Oqaaseqaat: Aammaarluni inuppalaassuseq tamatumani pingaaruteqarpoq: Ilaqutariit avissimasut imaluunniit ilaqutariit ataatsimik qassiinilluunniit innuttaassuserminnik allanngortitserusunngitsunik inuttallit ataatsimoorusuttulli tamatumuunakkut isiginiarneqarput. Tamanna atornerlunneqarluni ilaqutariit ilaat marloqiusamik pisinnaapput, taamaaliornikkulli taasisinnaatitaaneq pisinnaatitaaffiillu allat innuttaassusilinnut tunniunneqartut annaaneqassapput. Qimaasut eqqarsaatigalugit takorloorneqarsinnaasoq ingasannerpaaq tassaavoq suliniaqatigiiffiup umiarsuarmik qimaasunik issimasulimmik Kalaallit Nunaaliartitseratarsinnaanera. Qimaasunik ikiuisussaavugut, tamannali nunanut allanut sanilliulluta annerusumik eqqugaasussaajunnaarluta piviusorsiortumik aaqqiivigisariaqarparput. Maanga umiarsuarmik timmisartumilluunniit ingerlanissarsuarmut akissaqarsimagunik taava uatsinnit itigartinneqarnissamut angallassisullu peqataanerminnut pillaammik akiligassinneqarnissaanut akissaqarsimassapput. Taamaaliorluta pisinnaassuserput naapertorlugu qimaasunut ikiuussinnaavugut.

Inuit Nutaat - kikkuuvugut?

Kalaallit Nunaanni innuttaasugut nunanilu allani najugaqartugut Kalaallit Nunaata namminersortunngornissaanik pingaartitseqalutalu sulissuteqarpugut, inuiaat kiffaanngitsut imminnut akisussaaffigeqqullugit.

Stacks Image 14

Inuit Nutaat
Sorlaqarfik Anersaarlu Nukittuut
Inuiaqatigiit Peqqissut

Attavissat

  • Email: info@inuitnutaat.org
  • Facebook: inuitnutaat
  • Instagram: #inuitnutaat
  • www.inuitnutaat.org

© 2021 Inuit Nutaat email