Tunngavilersuut tusartuartagarput tassaavoq ”ila nunap aqunneqarneranik tigusinissamut naammattunik ilinniarsimasortaqanngilagut”. Ulluni maanna atukkatsinni ilinniakkat killingi ersernerluttunngorsimapput ilinniarnerlu ajornannginnerulersimaqaluni. 2021-imi nappaalanersuup takutippaatigut initsinnit nikinngikkaluarluta nunarsuarmi sumiluunniit pisunut peqataasinnaasugut. Ilinniagaqarneq ilinniaqqinnerlu tamatumani assut periarfissaqarput.

Nunasiatut pissuseqalersitaasimavugut ilinniagaqarneq ”piginnaanermut uppernarsaatitut” isigisalersimallugu. Nunarsuarmi sumiluunniit kinguaariit nutaat ilinniarneq sumik arlaannik soqutigisamut itisileriffittut isigilersimavaat. Amerlaqisut Ilinniarfimmiit ”ilinniarnermut uppernarsaammik” pisariaqartitsiunnaarput taarsiullugulu suliassat suliarinissaannut ilisimasaqarnissaq piumasarineqalersimalluni. Allaffissornermi suliffeqarfinnilu suliassarpassuit naammassisinnaajumallugit naqitamik uppernarsaateqarnissaq pisariaarussimavoq. Kalaallit Nunaata inerisarnerani tamanna atorluarsinnaaqaarput.

Kiisalu ilinniarnermi oqaatsit allat, soorlu tuluttut, danskit periarfissarititaannit 60-eriaammik periarfissaqartitsinerupput, ilami 250-eriaammik periarfissaqartitsinerupput nunat oqaatsit sallersaattut piinnarnagit tuluttut oqaluffiusut tamaasa ilanngukkaani.

Avatitsinni silarsuaq ilinniarfigisinnaasarput ammavoq. Atorlualerniartigu.